Drafitry ny fako amin'ny angovo ao Shina

Mamokatra fako eo amin'ny 300 tapitrisa taonina eo ho eo isan-taona i Shina, araka ny tatitra Banky iraisam-pirenena. Ny olan'ny fako ao amin'ny firenena dia nitombo be dia be tamin'ny ampahany tamin'ny mponina ao aminy mihoatra ny 1.3 lavitrisa, laharana ambony indrindra eran-tany. Ny vahaolana amin'ny fahasahiranan'ny fako ao Shina dia ny fananganana orinasa lehibe indrindra amin'ny fako mankany amin'ny angovo eran-tany, amin'ny fanantenana ny hiadiana amin'ny olana mitombo momba ny fihoaran'ny fako sy ny fanariana tsy ara-dalàna.   

Ny ozinina voalohany dia antenaina hitsangana amin'ny 2020, ary ho hita ao Shenzhen. Hahavita handoro fako 5,000 taonina isan’andro io orinasa io, ka ny 1/3 amin’ny fako no avadika ho angovo azo havaozina. Mirefy 66,000 metatra toradroa, ny tafon’ilay orinasa dia hosaron’ny “panneaux photovoltaic” mirefy 44,000 metatra toradroa, izay hampiasaina hamadihana ny angovo azo avy amin’ny masoandro ho herinaratra mivantana. Ity orinasa ity dia iray amin'ireo 300 kasain'ny governemanta Shinoa haorina mandritra ny efa-taona ho avy. Raha ampitahaina, tamin'ny faran'ny taona 2015, Etazonia dia nanana orinasa 71 mandeha amin'ny fako mankany amin'ny angovo ary manamboatra herinaratra any amin'ny fanjakana 20.  

Manantena ny governemanta Shinoa fa hanampy amin'ny fisorohana ny loza mitovitovy amin'ny fihotsahan'ny tany tany Shenzhen tamin'ny Desambra 2015 ihany koa ireo zavamaniry ireo. Nanomboka ny loza taorian'ny firodanan'ny fako fanorenana teo an-tampon'ny havoana iray nitsofoka tao amin'ny Faritanin'i Guangdong ao Shina Atsimo. Niafara tamin'ny fihotsahan'ny tany izay nandrakotra 380,000 metatra toradroa tao anaty fotaka telo metatra ny fianjerana ary nandevina trano 33 tao anatin'izany. Araka ny voalazan'ny lefitry ny ben'ny tanànan'i Shenzhen, Liu Qingsheng,  Olona 91 no mbola tsy hita popoka vokatry ity loza ity.